Në formën e konkursit mes dy qyteteve, Tiranës dhe Elbasanit, “Festa e Fërgesës”, gatimi tradicional i të dy zonave, bëri bashkë qytetarë dhe turistë të shumtë. Në krye të synimeve ishte ruajtja dhe përcjellja e traditës së këtyre trevave të kulinarisë shqiptare që mbartin.

Amvisa të qytetit të Elbasanit, por edhe Tiranës sollën për te gjithë shijen e gatimit të tyre. Fërgesë me gjizë, mëlçi dhe një shumëllojshmëri gatimesh të larmishme.

Themeluesja e kësaj tradite tashmë të nisur edhe në Elbasan, Dhurata Thanasi thotë se dikur gatimet vinin sipas gjendjes ekonomike të familjeve. E rëndësishme për të është gatimi me prodhimet vendase që këto dy qytete i kanë me shumicë.

“Është një trashëgimi, e cila jo vetëm sjell të mira nga ana e rikthimit ekonomik për turistët, për njerëzit që vijnë dhe vizitojnë Elbasanin, por ndihmon edhe ekonomitë tona. Ajo fërgesa që zonjat e Elbasanit kanë bërë aty, e kanë bërë me vajin e ullirit të zonës tonë, është një nga ullinjtë më të lartë dhe më me vlerë që ka Shqipëria”- tha Dhurata Thanasi.

“Është një nga recetat më interesante të këtij territori dhe është një trashëgimi jo materiale e cila duhet transmetuar në breza kështu që jo më kot unë shoh qe ka edhe fëmijë edhe gjyshër që do na e transmetojnë dhe është mirë ta transmetojmë edhe neve.”- theksoi Mirela Koçollari, arkeologe.

Sofra tradicionale u shtrua ne Porten Mikpritese të Kalasë së Elbasanit ku kryefjala ishte fërgesa. Nuk munguan grupet folklorike të Elbasanit dhe Tiranës që i dhanë atmosferë dhe ngjyra shijes tradicionale të fërgesës.

LEXONI GJITHASHTU:

• Putin takon Erdogan: S’ka marrëveshje për grurin pa u përmbushur kërkesat e Moskës
• Spahiu: Berisha-Basha-Bardhi luftë me njëri-tjetrin, jo me Ramën