Fermerët e Elbasanit pa treg, prodhimi ka mbetur stok

Edhe pse ky vit cilësohet si i mbarë për rendimentin e prodhimit të rrushit, fermerët që merren me këtë kulturë në fshatin Vreshtan të bashkisë Elbasan janë të pakënaqur për shkak se mungon tregu për shitjen e produktit.

Një pjesë të sasisë së rrushit e kanë dërguar në punishte për të përftuar raki. Por as kjo formë nuk vlen, pasi blerësit ofrojnë shumë pak.

Kjo nisur edhe nga fakti se janë rritur kostot e shërbimeve ndaj vreshtave.

Në këto kushte, fermerët kërkojnë një treg se ku mund të shesin atë që kanë prodhuar.

“Situata është për faqe të zezë. Rrushi na ngeli në shtëpi, çmimet janë katastrofike, shteti s’na ndihmon s’kemi treg. Kostot janë të larta, po paguajmë shumë e s’po fitojmë asgjë. Prodhimtaria është e mirë, treg s’ka fare. Ilaçet i kemi marrë sa qimet e kokës. Kemi falimentuar. Kërkojmë nga shteti të na ndihmojë se ne kemi falimentuar,” – u shpreh një fermer.

Përballë vështirësive që has bujqësia në vend, nga viti në vit është ulur ndjeshëm dhe numri i fermerëve në zonën e Shushicës të cilët më së shumti po emigrojnë drejt Greqisë për të kontribuar në bujqësinë e vendit fqinj.

LEXONI GJITHASHTU:

• Policia: 4 zyrtarë të Universitetit Bujqësor u arrestuan për abuzime me tenderët
• Meta: Fermerët po braktisen, bujqësia në gjendje zie për shkak të Open Balkan
• Fermerët e Shkodrës padisin Agjencinë e Bujqësisë, kërkojnë subvencionet