Fermerët në Durrës: Dëme të mëdha nga përmbytjet, institucione nuk kanë verifikuar situatën

Përmbytjet e ndodhura javët e fundit në Durrës kanë shkaktuar dëme të konsiderueshme, duke përmbytur mijëra banesa dhe sipërfaqe të mëdha toke bujqësore. Ndër zonat më të prekura janë Katundi i Ri, Sukthi, si dhe fshatrat Rrushkull, Perlat dhe Hamallaj.

Fermerët shprehen se dëmet janë të rënda, jo vetëm për shkak të tokave të mbjella që janë shkatërruar, por edhe për shkak të mbytjes së bagëtive. Sipas tyre, pavarësisht se kanë kaluar dy javë nga përmbytjet, asnjë institucion nuk ka shkuar në terren për të verifikuar situatën dhe dëmet e shkaktuara.

Ata theksojnë se përmbytjet nuk janë pasojë e reshjeve intensive, por e mungesës së mirëmbajtjes së kanaleve kulluese dhe mosfunksionimit të hidrovoreve.

“Dëmet shihen vet, duken vet që janë prishur, i ka mbuluar uji 4 ditë, nuk kullon kanali, është pa pastruar, hidrovori nuk punon, janë bërë shpenzimet kot. Këtu janë 10 dylym grurë nga 8 kuintal grurë. Në parcela nuk kanë ardhur për verifikim”

“Komplet tokën, kam 20 dylym jonxhë dhe 5 dylym grurë, kanë qenë nën ujë për 3 ditë, bagëtitë i kam pasur në ujë, edhe delet i kam pasur të gjitha në ujë. Shteti të na pastrojë kanalet, se Rrushkullin e ka përmbytur shteti, jo Erzeni.”

“Shteti të na pastrojë kanalet, asgjë tjetër nuk dua. Kanalet… unë kam 33 vjet këtu, asnjëherë nuk kam parë zetor aty, e kemi pastruar nganjëherë vetë”, thonë disa prej fermerëve.

Ata apelojnë për ndërhyrje urgjente nga institucionet përgjegjëse, si për pastrimin e kanaleve kulluese, ashtu edhe për verifikimin e dëmeve, në mënyrë që të shmangen humbje të mëtejshme dhe të shpëtohet sezoni bujqësor.