Festivali i Filmit në Dropull, prezantohen 40 prodhime artistike

Festivali Ndërkombëtar i Filmit të Shkurtër është në ditën e tij të tretë. 40 filma, shqiptarë dhe grekë do të marrin çmimet përkatëse për këtë vit.

Artistë të rinj, por dhe regjisorë të njohur shqiptarë dhe grekë, janë bërë bashkë për të shkëmbyer ide dhe eksperienca. Teatri antik i Sofratikës u kthye në frymëzim për Kosta Zhogën, dramat dhe ndeshjet e gladiatorëve shekuj më parë.

”Ideja e festivalit ka filluar tamam këtu në këtë vend. Kur e kam parë për herë të parë këtë teatër antik, më ka bërë një përshtypje shumë të thellë. Ndjemë një kënaqësi të veçantë si unë, si bashkëshortja kur erdhëm dhe thamë, pse mos të bëjmë diçka këtu në këtë vend. E para se është vendi ynë i origjinës, i imi. Unë jam nga Dropulli me origjinë dhe menduam që të bëjmë një festival filmi”, tregon Kosta Zhonga, drejtori artistik DIFF.

7 filma nga Qipro janë risia e këtij vitit, duke u bërë shteti i tretë që i bashkohet festivalit.

Filmat e animuar krijuar nga fëmijët në workshopin e animacionit si dhe atij të dokumentarit artistik, ishin një dëshmi e gjallë se arti është në çdo moshë.

Konsulli grek Dhimitris Sakaridhis, shprehu mirënjohjen për hapësirën që po i kushtohet minoritetit grek të zonës si dhe shpreson se në një të ardhme do t’u bashkohen dhe filma përfaqësues nga shtete të tjera të Ballkanit dhe Europës.

“Është një vend ku jeton minoriteti grek dhe është e rëndësishme që të ketë ngjarje të tilla, ku njerëz të kulturave të Greqisë dhe Shqipërisë vijnë këtu dhe prezantojnë prodhimet e tyre kulturore. Mund të thonë gjëra për shoqëritë tona dhe problemet me të cilat përballemi në shekullin e 21-të, këto probleme janë të zakonshme edhe në shoqëri të tjera evropiane. Shpresoj që vërtetë të mund të themelohet edhe si një festival ballkanik dhe ndërkombëtar i filmit”, u shpreh Konsulli Dhimitris Sakaridhis

Organizatorë të festivalit synojnë që përmes tij t’u jepet zë çështjeve të ndryshme si emigracioni, papunësia, largimi i të rinjve nga rrethet dhe nga vendi, por jo vetëm.

LEXONI GJITHASHTU:

• Festivali i Filmit në Dropull rrit bashkëpunimin kulturor mes shteteve
• Festivali i filmit të shkurtër, fituesit e Festivalit të Dropullit shfaqen në Tiranë