Finalja e Superkupës së Italisë, Milan-Inter premton spektakël

Një superndeshje pritet të mbajë të lidhur tifozët e futbollit italian, derbi i Milanos, i cili do të zhvillohet shumë kilometra larg, në Arabinë Saudite. Interi dhe Milani do të sfidojnë njëri-tjetrin për një prej trofeve më prestigjioze italiane, Superkupën e Italisë, që do të luhet në orën 20:00. Pas 9 vitesh, “djalli” rikthehet për të bërë të tijin këtë trofe, ndërsa në gjysmëfinale mposhti me përmbysje Juventusin, që është rekordmeni i këtij kompeticioni.

Nga ana tjetër, Interi i Inzaghit beson se do të arrijë trofeun e 9 në mbrëmje, duke u përpjekur të mbrojë titullin e kampionit, pasi në edicionin e fundit mposhti të njëjtin kundërshtar në finale. Edhe pse Milani nuk ka fituar Superkupën që prej vitit 2016, ai ende nuk qëndron shumë pas kundërshtarëve, pasi ka 7 trofe, ndërsa Interi ka 8 dhe Juventus 9.

Ndryshe nga përballjet e gjysmëfinaleve, Kingdom Arena në Riyadh pritet të jetë plot, kjo për shkak të kapacitetit të ulët, ndërsa spektakli është i garantuar. Dëmtimet mbeten një problem, sidomos për Conceicaon, trajnerin e Milanit, i cili e nisi mbarë aventurën e tij në këtë rol. Përballja e fundit direkte mes dy rivalëve të përbetuar i jep shpresë Milanit, që arriti të mposhtte Interin në kampionat me rezultatin 1-2. Në letër, favorizohen zikaltërit, ndërsa gjykimi do të bëhet nga 37-vjeçari Simone Sozza.