“Fitore historike”, Rama: Vota e diasporës, ushtrim i parë historik nga pjesmarrja

Kryeministri Edi Rama, në fjalimin e mbajtur këtë pasdite, e cilësoi si historike fitoren e Partisë Socialiste në zgjedhjet e fundit. Ai shprehu mirënjohjen e tij për të gjithë votuesit, me theks të veçantë për shqiptarët e diasporës që u regjistruan si zgjedhës për herë të parë.

“Jemi përballë një arritje e cila është historike jo thjesht për përmasën e PS-së, por për momentin historik kur kjo fitore mori jetë për Shqipërinë,” deklaroi Rama.

Ai vlerësoi kontributin e strukturave të PS-së dhe mbështetësve të saj, brenda dhe jashtë vendit.

“S’ka fjalë të mjaftueshme për të falënderuar dhjetëra e mijëra gra e burra, vajza e djem të familjes sonë politike që 4 vjet me radhë shtruan me përpjekje, durim e disiplinë, dhe së fundmi për 9 muaj pa pushim, rrugën e kësaj fitoreje të paharrueshme, edhe jashtë kufijve ku jetojnë shqiptarët,” u shpreh ai.

Në përfundim, kryeministri veçoi diasporën: “Një falënderim krejt të veçantë dua ta bëj për shqiptarët e Greqisë, Italisë, SHBA-së e kudo tjetër, ku qoftë edhe një shqiptar i vetëm u regjistrua si zgjedhës. Ka qenë ushtrim i parë historik dhe fantastik për nga pjesëmarrja, një nga më të lartët në Evropë për votimet e diasporës.”

LEXONI GJITHASHTU:

• Përfundon numërimi i votave preferenciale në qarkun e Beratit
• VIDEO-LIVE / Rama takim me mbështetësit pas fitores së zgjedhjeve të 11 majit