“Flamur Noka nën hetim nga SPAK”- Hitaj: Të gjithë deputetët të trembur para Dumanit

Gazetari Arbër Hitaj është shprehur se ish-drejtuesja e LSI-së, Monika Kryemadhi dhe deputeti i PD-së, Flamur Noka, janë nën hetim nga SPAK.

Komentet Hitaj i bëri në emisionin “Now me Erla Mëhillin” në Euronews Albania, ku tha se ditën e sotme të gjithë deputetët ishin të frikësuar para kreut të SPAK, Altin Dumanit, i cili bëri raportimin e punës së këtij institucioni.

Ai tha gjithashtu se është hera e parë që një drejtues i lartë i prokurorisë të flasë kaq hapur për përfshirjen e drejtuesve të lartë të Policisë në krimin e organizuar dhe për rolin e bankave në pastrimin e parave.

“Sot Dumanin e pashë ndryshe, ironizoi ish-kolegët e tij. E pashë më të relaksuar, ndoshta se ka rezultate më konkrete. Sepse ai operacioni që u zhvillua për krimin e organizuar flet shumë. Por pashë shumë frikë te deputetët e të dy kampeve, të gjitha ishin të vrerosur. Po t’i shihje në fytyrë, ata ishin mbi gjëmba. Mos të harrojmë një gjë, që disa janë në konflikt interesi.

Kryemadhi është nën hetim, zoti Noka gjithashtu. Unë e kam shfletuar raportin që paraqiti sot Dumani, është një nga më cilësorët që paraqet një institucion i pavarur. Më shqetësuese për mua janë institucionet bankare dhe policia.

Nuk kemi parë asnjëherë që një kryeprokuror të flasë kaq pa doreza për përfshirjen e drejtuesve të Policisë me grupe kriminale. Është hera e dytë që e thotë. Edhe për herë të parë përmend bankat, që janë ato që bëjnë pastrimin e parave dhe këto para thotë më pas hidhen në pasuri të patundshme”, tha Hitaj.

LEXONI GJITHASHTU:

• Flamur Noka: Shqipërisë i duhet qeveri teknike, të organizojë zgjedhje të ndershme
• 50 urdhër-arrestet e SPAK, Policia: S’ka indicie për dekonspirim të operacionit