Flamur Noka: Shqipërisë i duhet qeveri teknike, të organizojë zgjedhje të ndershme

Sekretari i përgjithshëm i partisë demokratike Flamur Noka tha në një deklaratë pas mbledhjes së kryesisë së PD, se vendi ka hyrë në një etapë të re zhvillimesh politike.

Ai tha se me anë të protestës së 20 shkurtit shqiptarët kanë treguar se janë gati për një ndryshim. Noka tha se Shqipëria duhet që më në fund të shkojë në zgjedhje të lira ndërsa hodhi edhe propozimin e krijimit të një qeverie teknike.

“Bashkimi i PD-së, krijimi i opozitës së bashkuar dhe protesta e datës 20 shkurt si kulmimi i zhvillimeve brenda opozitës, ishin kryefjala dhe treguan që PD-ja, opozita, por edhe vendi ka hyrë në një etapë të re zhvillimesh politike.

Protesta e qytetarëve, ai lum njerëzish që vërshoi në Tiranë, ajo energji njerëzore që u derdh në bulevardin ‘Dëshmorët e Kombit’, tregoi se Shqipëria ka nevojë për një ndryshim të madh.

Ai lum njerëzish, ai uragan popullor i dha një mesazh edhe PD-së, dhe kryesia jonë sot vendosi që ta lexojë dhe deshifrojë mirë dhe qartë, atë mesazh të njerëzve të lirë, demokratëve, opozitarëve që morën pjesë, edhe të paangazhuarve që morën pjesë, edhe të socialistëve të zhgënjyer dhe të shkelur me këmbë nga sekti i rilindjes, që morën pjesë.

Përkthimi i atij mesazhi është që ne do të zbresim në bazë, të gjithë do të zbresim të takojmë të gjithë qytetarët, pensionistët, fermerët, arsimtarët, mjekët, nënpunësit, të papunët, rininë.

Do të jemi çdo ditë në kontakt me ta, për të drejtuar gjithë këtë energji njerëzore dhe për ti dhënë një mundësi çlirimi gjithë kësaj energjie, që Shqipëria më në fund të shkojë në zgjedhje të lira dhe demokratike, me një qeveri teknike dhe jo më, me një qeveri që është armike e votës së lirë”,-tha Noka.

LEXONI GJITHASHTU:

• Plani për protestën/ Noka tregon skenarët. A do bashkohet Berisha me qytetarët?
• U vra me planifikimin e fëmijëve, Pëllumb Meta përcillet për në banesën e fundit