Ekipi i Flamurtarit në basketboll për femra është shpallur kampion i Ligës Unike.
Vajzat vlonjate ia dolën të fitojnë në finale me 10 pikë diferencë përballë Pejës, duke triumfuar kështu në një nga kompeticionet më të rëndësishme.
Flamurtari ishte në avantazh thuajse përgjatë gjithë takimit, ndërsa në fund e mbyllën ndeshjen me rezultatin 72-62.
Në përfundim të sfidës, trajneri i Flamurtarit, Agim Dalipi, nuk e fshehu lumturinë për fitimin e trofeut.
“Ishte një finale me përgjegjësi të madhe dhe objektivi jonë ishte që këtë kupë ta mbanim në Vlorë. Uroj vajzat për sakrificën, dëshirën dhe mundin. Merita u takon vajzave dhe spektatorëve”, tha trajneri i Flamurtarit, Agim Dalipi.
Basketbollistja Memushi e ka cilësuar një trofe të rëndësishëm dhe falenderoi tifozët e pranishëm.
“Ndihemi të gjitha shumë mirë. Kjo mungonte në arkivën e Flamurtarit. Ajo që na ka bërë të ndihemi mirë ka qenë publiku dhe e falënderojmë pa masë”, tha Tea Memushi, basketbolliste e Flamurtarit.
Një ndër lojtaret më të mira në këtë kompeticion ishte dhe Xhekson.
“Ishte ndeshje e vështirë, Peja luajti mirë dhe na i vështirësoi gjërat. Ne kishim mbështetjen e tifozëve, një energji e jashtëzakonshme që na ndihmoi shumë. Kundërshtarët ishin të fortë në garë, por ia dolëm”, thotë basketbollistja Xhekson.
Liga Unike është një kompeticion në të cilin marrin pjesë ekipet më të mira nga Kosova dhe Shqipëria.
LEXONI GJITHASHTU:
- Liga Unike e Basketbollit, Flamurtari luan në finale me Pejën
- “Kombëtarja turke merr basketbollistin tropojan, ndryshoi emrin për pasaportën e re”
