Fluks automjetesh në Gjirokastër, numër i lartë gjobash gjatë muajit korrik

Në rrugët kombëtare dhe dytësore në Qarkun e Gjirokastrës është rritur ndjeshëm fluksi i qarkullimit të automjeteve me pushues dhe turistë. Aktualisht në rrugët kombëtare Tepelenë-Kakavijë, Ura e Leklit-Çarçovë dhe Kardhiq-Sarandë veprojnë patrulla të lëvizshme të bluve të rrugores për monitorimin e trafikut dhe shmangien e aksidenteve.

Gjatë muajit korrik Policia Rrugore në Qarkun e Gjirokastrës ka ndëshkuar me masa administrative 2300 drejtues mjetesh si dhe janë proceduar penalisht 12 të tjerë, 5 prej të cilëve janë ndaluar nga policia. Policia ka pezulluar 12 leje drejtimi për shoferët që kanë shkelur Kodin Rrugor. Pjesa më e madhe e gjobave janë vendosur për tejkalim të shpejtësisë dhe parakalime të gabuara.

Vëmendje po i kushtohet mbikqyrjes së trafikut në zonën muzeale të Gjirokastrës dhe në pikat turistike të qarkut. Gjithashtu Policia Rrugore po monitoron edhe respektimin e fashës së lëvizjes nga kamionët e transportit të mallrave në rrugët kombëtare. Specialistët e Policisë Rrugore apelojnë për respektimin rigoroz të Kodit Rrugor në këtë periudhë pushimesh verore me trafik të rënduar automjetesh.