FNSH “rrethon” Vlorën, kontrolle në banesën e personit të rrezikshëm. Kapen mijëra €

Forca e Posaçme Operacionale dhe disa grupe të FNSh-së, kanë zbarkuar këtë të shtunë në qytetin e Vlorës, ku kanë kryer kontrolle në ambiente të ndryshme, të dyshuara të përdorura nga pjesëtarë të grupeve të ndryshme kriminale.

Policia informon se në banesën e një personi, pjesëtar i një grupi kriminal janë sekuestruar 39 mijë euro. Paratë dyshohet se janë vendosur si pasojë e aktivitetit kriminal të personit, ndërkohë që në banesë u sekuestruan në cilësinë e provës materiale, 1 armë zjarri pistoletë me fishek në fole, gati për qitje dhe municion luftarak.

Gjithashtu u shpall në kërkim pronari i banesës, Rodrigo Shemsho.

Policia informon se kontrollet intensive do të vijojnë në të gjithë qarkun, me qëllim parandalimin dhe goditjen e veprimtarive kriminale.

“Shërbimet e Policisë gjatë kontrollit në banesën e pjesëtarit të një grupi kriminal me veprimtari në fushën e krimeve të rënda kundër personit, në lagjen “Pavarësia”, gjetën dhe sekuestruan në cilësinë e provës materiale, 1 armë zjarri pistoletë me fishek në fole, gati për qitje, municion luftarak dhe shumën 39 000 euro, të dyshuara të përfituara nga veprimtaria e këtij grupi kriminal.

Në vijim të veprimeve procedurale, u shpall në kërkim shtetasi R. Sh., 33 vjeç, banues në Vlorë, për veprat penale “Mbajtja pa leje dhe prodhimi i armëve, armëve shpërthyese dhe municionit”, “Pastrimi i produkteve të veprës penale ose veprimtarisë kriminale” dhe “Fshehja e të ardhurave”. Vijon puna për lokalizimin dhe kapjen e këtij shtetasi”, thuhet në njoftimin e policisë.

LEXONI GJITHASHTU:

• Mbi 40 kilogramë heroinë, arrestohet 31-vjeçari nga Kurbini
• Shpërndante heroinë dhe metadon, arrestohet 35-vjeçari në Fier