Forcat e Armatosura në gatishmëri, Peleshi thirrje pushtetit vendor të marrë masa

Komiteti i Mbrojtjes Civile u mblodh për të diskutuar rreth situatës së krijuar nga reshjet me intensitet të lartë gjatë orëve të fundit, veçanërisht në qarqet Shkodër, Lezhë, ku rreziku për përmbytje është edhe më i lartë, por edhe në bashkitë Tiranë, Durrës, Vlorë e Fier.

“Me kryetarët e bashkive dhe Prefektët e këtyre qarqeve rakorduam planin e masave parandaluese dhe lehtësuese për menaxhimin e situatës edhe në orët në vijim, që sipas parashikimit të motit do të jenë me reshje të shumta,” – bëri me dije ministri i Mbrojtjes Niko Peleshi.

Ai siguroi që janë në çdo minutë në monitorim të situatës dhe Ministria e Mbrojtjes, Agjencia e Mbrojtjes Civile dhe Forcat e Armatosura janë në gatishmëri për çdo nevojë të pushtetit vendor dhe qytetarëve.

Një ditë më parë Peleshi lajmëroi se pritet që në orët në vijim në qarqet Shkodër, Lezhë, Kukës, Vlorë dhe Gjirokastër, të ketë reshje intensive të cilat mund të sjellin vërshime të përrenjve dhe lumenjve të vegjël dhe përmbytje në zonat urbane.

LEXONI GJITHASHTU:

• Reshje të dendura shiu në Tiranë, rritet niveli i Lanës
• FOTO| Reshje të dendura, rritet niveli i lumit Kir