Aktualitet | Lajmi i fundit

FOTO/ Me armë në valixhe, kapet duke kaluar në Rinas shqiptaro-kanadezi

17 Qershor 2025 | 09:52

Policia e Rinasit arrestoi një shtetas shqiptar me shtetësi kanadeze, pasi në valixhen e tij u zbulua një armë pistoletë gjatë kontrollit me skaner.

Sipas autoriteteve, shqiptari me inicialet A.Q., banues në Kanada, ishte në pritje të një fluturimi drejt Gjermanisë, ku dyshohet se do të trafikonte armën.

Zbulimi i armës u realizua falë kontrolleve të specializuara, të bazuara në analizën e riskut dhe informacionet e inteligjencës policore, të intensifikuara si pasojë e fluksit të lartë të udhëtarëve në hyrje-dalje.

Njoftimi i plotë

“Intensifikimi i kontrolleve nga Policia Kufitare godet një rast të tentativës për të trafikuar armë zjarri, tranzit, nga Shqipëria në Gjermani.

Sekuestrohet 1 armë zjarri pistoletë me municion luftarak dhe arrestohet në flagrancë poseduesi i saj.

Si rezultat i kontrolleve të dedikuara, bazuar në analizën e riskut dhe në informacionet e inteligjencës policore, të intensifikuara për shkak të fluksit në hyrje/dalje, shërbimet e Policisë Kufitare të PKK Rinas, në bashkëpunim me shërbimet e sigurisë në aeroportin e Rinasit, finalizuan operacionin policor të koduar “Tranzit”, në kuadër të të cilit u godit një rast i tentativës për të trafikuar armë zjarri nga Shqipëria në Gjermani.

Gjatë këtij operacioni u kap në flagrancë në dalje të Shqipërisë dhe u vu në pranga shtetasi shqiptar me nënshtetësi kanadeze A. Q., banues në Kanada.

Nga kontrolli nëpërmjet skanerit, në bagazhet e këtij shtetasi, u gjet dhe u sekuestrua në cilësinë e provës materiale, 1 armë zjarri pistoletë me municion luftarak.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme, për veprën penale “Trafikimi i armëve dhe i municionit”. thuhet në njoftimin e policisë.

LEXONI GJITHASHTU: