Franca bllokon eksportin e pikturës së humbur italiane me vlerë 24 milion euro

Franca ka bllokuar eksportin e një pikture nga artisti i epokës së Rilindjes Cimabue, pasi ishte blerë në një ankand për 24 milion euro.

Vepra e artit, e humbur prej shumë vitesh, u gjet e varur në kuzhinën e një gruaje të moshuar franceze. Ajo më pas u ble nga një çift koleksionuesish nga Kili në fund të tetorit, 4-fish më shumë se çmimi i ankandit.

Por, të hënën, Ministria e Kulturës në Francë deklaroi se kishte refuzuar certifikatën e eksportit për veprën e artit, të titulluar “Tallja e Krishtit”.

Ministri i Kulturës Franck Riester deklaroi se kishin vendosur të ndalonin eksportin pasi piktura – 1 nga 10 veprat e artistit që i ka mbijetuar kohës – do të qëndrojë në koleksionin kombëtar të Francës.

Shteti ka një afat prej dy vitesh për të bërë një ofertë për të blerë pikturën.

Për më tepër, u zbulua se gruaja e moshuar që kishte pikturën ndërroi jetë shumë pak pas ankandit, çka do të thotë se trashëgimtarët e saj duhet të paguajnë rreth 9 milion euro taksë trashëgimie.

Piktura, me përmasa 20×26 centimetra, besohet se është pjesë e një diptiku, e përbërë nga 8 panele të vogla.

Cimabue, i lindur në Firence në vitin 1240, ishte një pionier i pikturës primitive italiane. Ai ka qenë i pari që përdori perspektivën si dhe solli një stil pikture më natyrale, duke thyer traditën mesjetare dhe bizantine.