Franca, Gjermania dhe Britania e Madhe kanë dënuar me forcë bllokadën e vazhdueshme të ndihmës humanitare nga Izraeli në Rripin e Gazës, duke paralajmëruar për pasoja katastrofike humanitare dhe duke kërkuar një rifillim të menjëhershëm të shpërndarjes së ndihmave pa pengesa, si dhe ripërtëritje të përpjekjeve për një armëpushim të qëndrueshëm.

Në një deklaratë të përbashkët, ministrat e Jashtëm të tre vendeve thanë se “Izraeli ka bllokuar plotësisht hyrjen e ndihmave humanitare në Gaza për më shumë se 50 ditë”, një situatë që e kanë cilësuar si “të patolerueshme” dhe në kundërshtim me të drejtën ndërkombëtare.

“Civilët palestinezë, përfshirë një milion fëmijë, përballen me rrezik akut nga uria, sëmundjet dhe vdekja. Furnizimet thelbësore ose nuk janë më të disponueshme, ose mbarojnë menjëherë”, thuhet në deklaratë.

Tri vendet kujtojnë se gjatë periudhës së armëpushimit dy mujor në janar, ndihmat ishin të mundshme nëpërmjet OKB-së dhe organizatave ndërkombëtare. Situata aktuale, sipas tyre, bie ndesh me standardet humanitare dhe minon mundësinë për paqe.

Gjithashtu, ata e quajnë “të papranueshme” politizimin e ndihmës humanitare nga ministri izraelit i Mbrojtjes, Israel Katz, dhe planet për një prani të zgjatur izraelite në Gaza pas luftës.

“Ndihma nuk duhet përdorur si mjet presioni politik dhe as nuk mund të justifikohet asnjë ndryshim demografik apo gjeografik i territorit palestinez,” thuhet në deklaratë, duke kërkuar që Izraeli të garantojë qasje të plotë për OKB-në dhe organizatat humanitare.

Deklarata ndalet edhe te shqetësimi për sigurinë e punonjësve të ndihmës dhe sulmet ndaj infrastrukturës mjekësore.

“Shprehim zemërimin tonë për sulmet e fundit ndaj personelit humanitar dhe shëndetësor. Izraeli duhet të bëjë shumë më tepër për të mbrojtur civilët dhe strukturat kritike,” theksojnë ministrat.

Në përfundim, ata kërkojnë rivendosjen e mekanizmave të koordinimit humanitar dhe lehtësimin e evakuimeve mjekësore nga Gaza, si pjesë e një përgjigjeje të menjëhershme ndaj krizës humanitare.

Që prej 2 marsit, Izraeli ka mbyllur të gjitha kalimet kufitare të Gazës, duke bllokuar hyrjen e ndihmave. Sipas të dhënave të fundit, që nga tetori 2023, më shumë se 51,000 palestinezë, shumica gra dhe fëmijë, janë vrarë nga sulmet izraelite në territorin e rrethuar.

LEXONI GJITHASHTU:

• Propozim i ri për armëpushim në Gaza: Hamasi sinjalizon gatishmëri për marrëveshje
• Bisdat e sulmit ndaj Houthi-ve në Signal, Trump mbron Hegseth