Qeveria në Francë do t’u ndalojë nxënësve të shkollave publike të ndjekin mësimin me “abaja”, veshja që mbulon tërësisht gratë me besim mysliman.

Ministri i Arsimit Gabriel Attal, që u promovua në postin e tij pak muaj më parë, e bëri njoftimin në një intervistë për televizionin francez “TF1”.

“Kur hyn në një klasë mësimore nuk duhet të identifikosh  fenë e nxënësve vetëm duke i parë ata”, deklaroi Attal.

Në 2004-n, një ligj francez ndaloi mbajtjen e simboleve ose veshjeve përmes të cilave studentët tregonin përkatësinë fetare në shkolla. Ligji u aplikua edhe për kryqin e krishterë në përmasa të mëdha, për kapuçin hebre dhe shallin islamik për mbulimin e kokës.

Megjithatë, “abajatë” u toleruan deri në nëntorin e kaluar. Asokohe, Ministria e Arsimit shpërndau një qarkore ku veshja mbuluese përfshihej në grupin e rrobave që mund të ndaloheshin nëse mbaheshin në mënyrë që tregonin përkatësinë fetare.

Debatet mbi veshjen islamike në Francë u intensifikuan në 2020-n, kur një student çeçen i preu kokën një mësuesi që u kishte treguar nxënësve karikatura të profetit Muhamed.

Kreu i sindikatës së mësuesve e mirëpriti njoftimin e fundit. Po ashtu, ai u vlerësua edhe nga Eric Ciotto, kreu i subjektit të djathtë opozitar, Partia Republikane.

• Pronari dëbon nga plazhi familjen myslimane, shkak vajza e mbuluar me shami
• Franca ndalon veshjet e vajzave myslimane në shkolla, e quan “sulm politik”