“Fredi Beleri i barabartë para ligjit si kushdo”, MEPJ i përgjigjet Athinës

Ministria e Punëve të Jashtme ka reaguar pas arrestimit të kandidatit të koalicionit “Bashkë Fitojmë” për Himarën Fredi Beleri, njëkohësisht përfaqësues i minoritetit grek.

Përmes një njoftimi për mediat, MEPJ theksin se blerja e votës është një shkelje e rëndë në legjislacionin shqiptar dhe Fredi Beleri është i barabartë para ligjit si kushdo tjetër.

“Blerja e votës është një shkelje e rëndë në legjislacionin tonë dhe të gjitha institucionet e zbatimit të ligjit kanë prioritet luftimin e saj gjatë kohës së zgjedhjeve. Kjo vlen për të gjithë qytetarët e Republikës së Shqipërisë, përfshirë vëllezërit dhe motrat e minoritetit grek që marrin pjesë në zgjedhjet tona. Kandidatura e shtetasit shqiptar, Alfred Beleri që kandidon për zgjedhje nga bashkëqytetarët e tij, nuk kërkon ndonjë trajtim të veçantë. Ai është i barabartë para ligjit si kushdo tjetër. I takon vetëm prokurorëve dhe gjyqtarëve që ta trajtojnë këtë çështje në përputhje me provat. Me respekt, u kërkojmë miqve tanë grekë në Athinë që të monitorojnë nga afër e me durim zhvillimin e çështjes, duke lejuar drejtësinë shqiptare të kryejë punën e saj, pa presione të jashtme apo mesazhe përçarëse. Është mirë të mbajmë të informuar Brukselin, por duhet të presim edhe shfaqjen e fakteve”, thuhet në njoftimin e MEPJ.

Kandidati i koalicionit “Bashkë fitojmë” për Bashkinë Himarë, Fredi Beleri u arrestua një ditë më parë me urdhër të Prokurorisë së Vlorës me akuzën e blerjes së votave.

LEXONI GJITHASHTU:

• Arrestimi i Belerit, Prençi; S’duhet të ishte kandidat, mbështet emigrantët në Greqi
• Ambasadorja greke në komisariatin e Vlorës, pritet të takojë avokatin e Belerit