Fushata elektorale, OSBE: Mbështesim deklaratat e Komisionerit Shtetëror të Zgjedhjeve

Prezenca e OSBE në Shqipëri ka mbështetur deklaratat e kryetarit të Komisionarit Shtetëror të Zgjedhjeve, Ilirjan Celibashi, drejtuar partive politike, ku ka kërkuar vetëpërmbajtje në fushatën zgjedhore të 25 prillit.

“Zgjedhjet janë për qytetarët, partitë politike të tregojnë maturi dhe vetëpërmbajtje”, apeloi kreu i KSHZ-së, Ilirjan Celibashi.

Sipas OSBE, partitë politike duhet të respektojnë rregullat e veprimtarive politike dhe të mos përdorin burimet publike, për qëllime elektorale.

…janë që të gjitha parakushte thelbësore për një proces zgjedhor modern në përputhje me rekomandimet e OSBE/ODIHR-it.

— OSCE Presence in Albania (@OSCEinAlbania) March 25, 2021

“Prezenca e OSBE-së në Shqipëri mbështet deklaratat më të fundit të Komisionerit Shtetëror të Zgjedhjeve, Z. Ilirjan Celibashi, në lidhje me sjelljen e partive politike dhe institucioneve gjatë fushatës zgjedhore për zgjedhjet e përgjithshme të 25 prillit.  Zbatimi i dispozitave të legjislacionit zgjedhor, ndalimi i përdorimit të burimeve publike, sjellja e rregullt e institucioneve, përfshirë edhe ato të qeverisjes vendore, si dhe kryerja e rregullt e veprimtarive politike, janë të gjitha parakushte thelbësore për një proces zgjedhor modern në përputhje me rekomandimet e OSBE/ODIHR-it”, shkruan OSBE.

Dy partitë kryesore politike, PD dhe PS do hapin sot fushatën elektorale të 25 prillit. Partia Demokratike ka zgjedhur sheshin “Nënë Tereza”, kurse Partia Socialiste do bëjë hapjen e fushatës në sheshin “Skënderbej”.

Lexoni gjithashtu: 

PS dhe PD çelin sot fushatën, policia masa për të shmangur incidente mes simpatizantëve