Futboll për bamirësi, legjendat e Flamurtarit ndeshen me emigrantët e ardhur nga SHBA

Legjendat e Flamurtarit të viteve ‘80-‘90 janë ndeshur në futboll me një përfaqësi shqiptarësh që jetojnë në SHBA.

Aktiviteti i zhvilluar në ambientet e stadiumit “Flamurtari” kishte si qëllim mbledhjen e një fondi në mbështetje të Shtëpisë së Foshnjës në Vlorë.

Emrat e mëdhenj të futbollit vlonjat si Vasil Ruçi, Kreshnik Çipi, Rrapo Taho, Latif Gjondeda, Roland Iladhi, Saimir Haxhiu e të tjera zbritën sërish në stadiumin Flamurtari.

Ish-futbollistët Rrapo Taho, Kreshnik Cipi, Saimir Haxhiu por edhe Prefekti i qarkut Vlorës pjesë e lojës, kanë vlerësuar maksimalisht duke theksuar rëndësinë e aktiviteteve te tilla ndërsa urojnë që Flamurtarit t’i rikthehet lavdia e dikurshme.

Mes emocionesh Agron Alikaj ish-futbollist i Apolonisë sot në SHBA, por edhe përfaqësues të ekipit nga Çikago kanë treguar se sa të emocionuar ndihen që luajnë përballë emrave të tillë, por edhe që zbresin në fushën e stadiumit Flamurtari.

Në fund nuk ka munguar edhe një ceremoni simbolike ku ish-futbollistët kanë dorëzuar donacionin e mbledhur për Shtëpinë e Foshnjës.