Gara për kreun e ri të BKH, mblidhet Komisioni i Pastërtisë së Figurës dhe Pasurisë

Ka nisur zyrtarisht procesi për zgjedhjen e drejtorit të ri të Byrosë Kombëtare të Hetimit. Komisioni i Pastërtisë së Figurës dhe Pasurisë, i ngritur për këtë qëllim, është mbledhur për të shqyrtuar dokumentacionin e kandidatëve.

Komisioni përbëhet nga dy prokurorët e SPAK, Behar Dibra dhe Eneid Nakuçi, kryetarja e Apelit të GJKKO-së Saida Dollani, si dhe dy agjentë të BKH-së. Shtatë kandidatët në garë kanë dorëzuar dokumentacionin e kërkuar, duke dhënë miratimin për kontrollin e pasurisë dhe të figurës, si për veten ashtu edhe për familjarët e tyre.

Secilit prej kandidatëve do t’i caktohet një relator përmes shortit, i cili do të kryejë verifikimet e nevojshme. Ndërkohë, më 1 shtator, Këshilli i Lartë i Prokurorisë pritet të konstatojë përfundimin e mandatit 5-vjeçar të Aida Hajnajt, e cila ka drejtuar BKH që nga themelimi.

Deri në përzgjedhjen e drejtuesit të ri, Byroja Kombëtare e Hetimit do të drejtohet nga zv.drejtori Joni Keta, i cili është gjithashtu një nga kandidatët në garë për këtë post.

LEXONI GJITHASHTU:

• Mbyllet testi i së vërtetës për drejtuesin e BKH
• Gara për drejtimin e BKH, kandidatët në provë me testin me shkrim dhe atë logjik