Garcia rinovon me Real Madridin deri në vitin 2030, klauzola e lirimit 1 mld dollarë

Pas paraqitjes së tij në Kupën e Botës për Klube me fanellën me numrin 30, Gonzalo Garcia ka firmosur një kontratë të re me Real Madridin, që e mban të lidhur me klubin deri në vitin 2030.

Qendërsulmuesi 21-vjeçar spikati në këtë turne duke shënuar katër gola dhe dhënë një asist në gjashtë ndeshje, çka i siguroi një ofertë rinovimi nga “Los Blancos”. Sipas të përditshmes AS, klauzola e lirimit të lojtarit është vendosur në 1 miliard dollarë.

Garcia është formuar në akademinë e Real Madridit dhe sezonin e kaluar shkëlqeu me ekipin rezervë, ku realizoi 25 gola dhe dha 4 asiste në 36 ndeshje të Primera Federacion, duke vendosur një rekord të ri për numrin e golave në një sezon në këtë kategori. Ai gjithashtu kontribuoi me një asist në tre paraqitje në La Liga me ekipin e parë.

Trajneri i Real Madrid Castilla, Xabi Alonso, është shprehur me nota të larta për sulmuesin:

“Ai është një numër 9 tipik. Më kujton Raulin”, tha ai në një konferencë për shtyp më 27 korrik.

Ndërsa në një moment u përfol se Garcia do të merrte fanellën me numrin 9 – të liruar nga Kylian Mbappé, i cili tashmë ka zgjedhur numrin 10 në fund, numri 9 i shkoi brazilianit Endrick, ndërsa Garcia do të mbajë numrin 16 në sezonin e ardhshëm.