“Gati për 15 ditë”, Balluku inspekton punimet në aksin Orikum-Dukat

Zëvendëskryeministrja dhe Ministër i Infrastrukturës dhe Energjisë, Belinda Balluku inspektoi këtë të hënë kantierin e rrugës Orikum-Dukat.

Balluku tha se rruga është 2 km e fundit të tapetit të asfaltit dhe pritet të përfundojë brenda 15 ditësh.

Ministrja u shpreh se sfida për këtë sezon veror është mbarimi i tunelit të Llogarasë brenda datës 30 qershor, ashtu siç është premtuar.

“Rruga Orikum – Dukat ka një gjatësi prej 14.75 kilometrash, fillon në portin e Jahteve dhe përfundon në Urën e Shën Elizës ku është dhe lidhja me tunelin e Llogarasë. Është rrugë e kategorisë C2, me një gjerësi 3.5 metra për çdo drejtim kalimi. Ky projekt është i gjithi i trajtuar si në mbrojtjen e shpateve, pjesën hidraulike të tij dhe të gjithë veprat e artit të nevojshme”, tha Gjyli.

Ministrja Balluku e cilësoi si të rëndësishme përfundimi e këtij aksi, i cili lidhet me tunelin e Llogarasë, një tjetër vepër e cila parashikohet të jetë e aksesueshme për drejtuesit e mjeteve në fund të muajit qershor. Me përfundimin e këtij aksi, tha Balluku lehtësohet ndjeshëm qarkullimi rrugor në këtë zonë, duke rritur njëkohësisht edhe parametrat e sigurisë rrugore.

“Për dy javë e dorëzojmë përfundimisht dhe më pas përqendrojmë të gjitha forcat në tunelin e Llogarasë dhe në aksin e Thumanë-Kasharit që unë mendoj që është ajo që presin më shumë këtë vit shqiptarët, por dhe vizitorët e huaj, pasi trafiku me të vërtetë ka qenë i rënduar vitet e fundit edhe për shkak të numrit të shumtë të avionëve që vijnë në Rinas, por edhe për lëvizjen që ndodh mes Shqipërisë dhe Malit të Zi”, nënvizoi Balluku.

Aksi rrugor lidh bypass-in e Vlorës dhe portin e Jahteve në Orikum me tunelin e Llogarasë.

LEXONI GJITHASHTU:

• Balluku ndjek aksionin për kontrollin e pajisjeve me gaz në strukturat hoteliere
• Balluku viziton qendrën e Inovacionit ICT në Mat, ku ndjekin trajnimet mbi 80 fëmijë