Gaza: Të paktën 19 palestinezë u vranë nga ushtria izraelite ndërsa prisnin ndihmat

Të paktën 19 persona janë vrarë dhe 23 janë plagosur nga zjarri izraelit mbi banorët e Gazës që prisnin ndihma humanitare në rrethrrotullimin e Kuvajtit në qytetin e Gazës të shtunën, sipas Zyrës së Qeverisë për Media në Gaza.

“Ushtria pushtuese dhe tanket hapën zjarr me mitralozë ndaj njerëzve të uritur që prisnin thasë me miell dhe ndihma në një vend të largët që nuk përbënte kërcënim për pushtimin”, tha Zyra e Mediave të Qeverisë në Gaza.

Forcat e Mbrojtjes të Izraelit (IDF) thanë se raportet që pretendojnë se sulmuan dhjetëra banorë të Gazës në një kolonë ndihmash janë të pasakta dhe se një rishikim i incidentit është duke u zhvilluar.

Rrethrrotullimi i Kuvajtit në qytetin e Gazës është bërë i njohur si një zonë ku kamionët e ndihmave shpërndajnë ushqime, duke tërhequr turma njerëzish të dëshpëruar për furnizime.

Të vdekurit dhe të plagosurit u dërguan në spitalin Baptist Al-Ahli, në lindje të qytetit të Gazës, sipas autoriteteve të Gazës dhe gazetarit lokal Khader Al-Za’anoun, i cili punon për CNN në terren.

Një zëdhënës i Drejtorisë së Mbrojtjes Civile të Gazës, kapiteni Mahmoud Basal, tha se viktimat ishin “rezultat i pushtimit të forcave izraelite që synonin banorët që shkuan për të kërkuar ushqim për të ndihmuar familjen dhe fëmijët e tyre”.

• Homazhe për Jorgo Papingjin/ Autori i mbi 4 mijë poezive u shua në moshën 81-vjeçare
• Ish-korrespondenti i REL-it në Bjellorusi dënohet me tre vite burg