Gazetari denoncon sulm fizik në Shkodër, reagon policia: Kemi identifikuar njërin prej autorëve

Një gazetar ka denoncuar se është dhunuar në Shkodër, sipas kallëzimit që vetë ai ka bërë pranë autoriteteve, ndërsa Policia e Shtetit njofton se ka identifikuar njërin prej agresorëve të dyshuar dhe po vijon punën për zbardhjen e plotë të ngjarjes.

Sipas deklaratës zyrtare, në ambientet e Komisariatit të Policisë Shkodër është paraqitur shtetasi E. D., gazetar, i cili ka kallëzuar se rreth orës 20:00 është goditur me grushte nga disa persona në lagjen “Skënderbeg”, në Shkodër.

Policia njofton se menjëherë ka kryer veprimet e para hetimore dhe ka identifikuar një prej të dyshuarve, shtetasin P. Gj., ndërsa vijon puna për identifikimin e personave të tjerë të përfshirë në konflikt dhe shoqërimin e tyre në komisariat.

Grupi hetimor, nën drejtimin e Prokurorisë, po vijon veprimet për sqarimin e plotë të rrethanave të ngjarjes dhe dokumentimin ligjor të saj.