Gent Cakaj takon Vjosa Osmanin: Kosova dhe Shqipëria duhet të jenë një zë i vetëm

Ministri në detyrë për Evropën dhe Punët e Jashtme, Gent Cakaj gjatë një vizite në Prishtinë zhvilloi një takim me Presidenten në detyrë të Republikës së Kosovës, Vjosa Osmanin.

Lajmi bëhet i ditur nga vetë ministri Cakaj, i cili thotë se takimi mes tyre është fokusuar në diskutime për disa hapa konkretë në funksion të bashkëpunimit strategjik në fushën e politikës së jashtme dhe rëndësinë e qasjes së bashkërenduar në arenën ndërkombëtare të dy vendeve.

“Kosova dhe Shqipëria, si dy shtete që i takojnë një kombi, duhet të jenë absolutisht një zë i vetëm, sa i përket politikës së jashtme”, shkruan ministri.

Takimi mes tyre vjen në një kohë, ku situata politike në Kosovë është e paqartë pas dërgimit në Hagë të ish-krerëve të Ushtrisë Çlirimtare të Kosovës, të cilët tashmë e kanë nisur përballjen me akuzat për krime lufte.