Gjendet e mbytur në lumin Buna një grua, dyshohet të jetë hedhur nga ura

Një 63-vjeçare është gjetur e pajetë në ujërat e lumit Buna në Shkodër.

Përmes një njoftimi Policia bën me dije se dyshohet se 63-vjeçarja të jetë vetë-hedhur në lumë nga Ura e Bunës.

Po ashtu bëhet me dije se në trupin e viktimës nuk janë konstatuar shenja dhune dhe dyshohet se kjo shtetase vuante nga depresioni.

Ndërkohë grupi hetimor po punon për zbardhjen e plotë të rrethanave të ngjarjes së rëndë.

Kujtojmë se kjo ngjarje e rëndë vjen pak ditë pasi 39-vjeçarja Alma Arrazi vendosi t’i jepte fund jetës së saj dhe 3 fëmijëve, duke u mbytur pikërisht në lumin Buna.

Njoftimi i Policisë:

Shkodër/Informacion paraprak

Rreth orës 16:25, shërbimet e Policisë kanë marrë njoftim se një shtetase është hedhur në ujërat e lumit Buna.

Me marrjen e njoftimit, shërbimet e Policisë kanë shkuar menjëherë në adresën e dhënë.

Punonjësit e Policisë, me një varkë janë futur në lumë dhe kanë nisur kërkimet.

Shërbimet e Policisë kanë gjetur trupin e pajetë të shtetases Sh. O., 63 vjeçe, banuese në lagjen “Dobraç”, e cila dyshohet se është vetëhedhur nga ura e vjetër e lumit Buna.

Nga këqyrja paraprake e trupit të pajetë, nuk janë konstatuar shenja dhune, si dhe nga veprimet e para hetimore dyshohet se kjo shtetase vuante kohët e fundit, nga depresioni.

Grupi hetimor në drejtimin e prokurorit, vijon punën për zbardhjen e plotë të rrethanave të rastit.

LEXONI GJITHASHTU:

• Greqi| Mbytet në det fëmija shqiptar, gjendet nga një banor i zonës
• Turisti polak futet për t’u larë te Liqeni i Tiranës, rrezikon të mbytet