Gjenerali gjerman: Në çdo kohë Rusia mund të hyjë në territorin e NATO-s

Gjenerali gjerman Alexander Sollfrank deklaroi se Rusia zotëron kapacitetin për të ndërmarrë në çdo kohë një ofensivë të shpejtë ndaj territorit të NATO-s.
Në një intervistë për agjencinë Reuters, ai paralajmëroi se një sulm i gjerë kundër aleancës mbetet një mundësi reale deri në vitin 2029, nëse Moska vazhdon me të njëjtin ritëm të prodhimit dhe furnizimit me armatime.

Sipas tij, pavarësisht humbjeve në frontet tokësore, Rusia ruan një forcë të konsiderueshme ajrore dhe një arsenal bërthamor ende të paprekur. Sollfrank theksoi gjithashtu se Moska ka në dispozicion mjaftueshëm tanke për të ndërmarrë një ofensivë të menjëhershme, megjithëse nuk ka shenja se një veprim i tillë është në plan aktualisht.

“Në bazë të aftësive që ka aktualisht, Rusia mund të nisë që nesër një sulm të kufizuar kundër një vendi të NATO-s,” u shpreh ai.
Gjenerali nënvizoi tre elementë kyç që mund të përcaktojnë nëse një sulm i tillë do të ndodhë: fuqia ushtarake, përvoja luftarake dhe udhëheqja politike e Rusisë.

“Këta faktorë tregojnë se një sulm rus nuk mund të përjashtohet. Nëse ai do të realizohet apo jo, kjo varet nga mënyra se si do të reagojmë ne,” shtoi Sollfrank.

Në këtë kontekst, Gjermania ka njoftuar planin për të zgjeruar trupat e saj të armatosura me rreth 60 mijë efektivë të rinj, duke e çuar numrin total të ushtarëve në afërsisht 260 mijë, si pjesë e përpjekjeve të NATO-s për të forcuar mbrojtjen kolektive.

LEXONI GJITHASHTU: 

• Merz: Sirianët nuk kanë pse të kërkojnë azil në Gjermani, lufta ka përfunduar
• Përfitoi mbi 33 mijë euro përmes mashtrimit, ekstradohet rumunia nga Gjermania