Gjermania mbyll konsullatat iraniane pas ekzekutimit të shtetasit gjermano-iranian

Gjermania do të mbyllë të gjitha konsullatat iraniane në vend për shkak të ekzekutimit të shtetasit gjermano-iranian Jamshid Sharmad, por do të lejojë që ambasada iraniane të mbetet e hapur, njoftoi sot Ministria e Jashtme gjermane.

Zëdhënësi i Ministrisë tha dje se vrasja e Sharmadit acaroi “jashtëzakonisht” marrëdhëniet midis Berlinit dhe Teheranit, raportoi Reuters.

Gjermania ka tërhequr tashmë ambasadorin e saj në Iran për ekzekutimin e Sharmad dhe ka thirrur të ngarkuarin me punë të Iranit për të shprehur protestën e Berlinit.

Ministrja e Jashtme gjermane Analena Berbock tërhoqi ambasadorin pasi ai ia dorëzoi zyrtarisht protestën gjermane ministrit të jashtëm të Iranit.

Kancelari gjerman Olaf Scholz dënoi ashpër Iranin të martën për ekzekutimin e Sharmad, duke e quajtur ekzekutimin e dënimit të tij me vdekje një “skandal”.

Udhëheqësi i opozitës Friedrich Mertz i bëri thirrje qeverisë të rishikojë politikën e saj ndaj Iranit, duke përfshirë një vendim që ambasadori i Iranit duhet të dëbohet nga vendi.

Ai gjithashtu kërkoi që sanksionet kundër Teheranit të forcohen në nivel evropian dhe të merren masa konkrete kundër prokurorëve publikë, gjykatave dhe autoriteteve të sigurisë përgjegjëse për ekzekutimin e Sharmad.

LEXONI GJITHASHTU:

• Scholz: Gjermania do vazhdojë të furnizojë Izraelin me armë
• Gjermania dërgon raketa AIM-9L dhe mijëra dronë në Ukrainë