Gjermania vendos mbrojtjen ajrore Arrow për t’iu kundërvënë kërcënimit raketor rus

Gjermania u bë të mërkurën kombi i parë evropian që vendosi sistemin e mbrojtjes ajrore Arrow, të ndërtuar për të kapur raketa balistike me rreze të mesme veprimi, të tilla si Oreshnik i Rusisë , ndërsa kërkon të kundërshtojë atë që e sheh si një kërcënim në rritje nga Moska.

Sistemi, i zhvilluar nga Israel Aerospace Industries (IAI) në bashkëpunim me Agjencinë Amerikane të Mbrojtjes nga Raketat, përdoret si shtresa e sipërme e mbrojtjes raketore të Izraelit, së bashku me Kupolën e Hekurt, e cila eliminon kërcënimet me rreze të shkurtër veprimi.

Një numër vendesh kanë shprehur interes për blerjen e teknologjisë që kur sistemi Arrow ndihmoi në pengimin e sulmeve raketore iraniane ndaj Izraelit në prill dhe tetor 2024. Ministri gjerman i Mbrojtjes Boris Pistorius theksoi vlerën e sistemit për paralajmërimin e hershëm dhe mbrojtjen e popullsisë dhe infrastrukturës.

“Me këtë aftësi strategjike, e cila është unike midis partnerëve tanë evropianë, ne po sigurojmë rolin tonë udhëheqës në zemër të Evropës. Prandaj, ne jo vetëm që po mbrojmë veten, por edhe partnerët tanë. Në këtë mënyrë, ne po forcojmë shtyllën evropiane të NATO-s dhe po arrijmë një qëllim të NATO-s”, tha ai.

Gjermania synon të ketë një sistem, i cili është projektuar për të mbuluar të gjithë vendin dhe do të vendoset në tre zona, në pjesën veriore, jugore dhe qendrore të vendit, dhe do të jetë funksional deri në vitin 2030.

LEXONI GJITHASHTU:

• Foltorja e Salianjit, zbulohet mesazhi i drejtuesve të Berishës ndaj demokratëve
• Salianji para takimit në Durrës: PD të kthehet te njerëzit, te kafet