Gjirokastra e vizitorëve, 80% të kapaciteteve të prenotuara për sezonin e vjeshtës

Në këtë fillmshtatori Gjirokastra vazhdon të mirëpresë një numër të lartë turistësh ndërsa përgjatë këtij viti qyteti i gurtë është vizituar nga rreth 240 mijë turistë. Përfaqësuesit e biznesit lokal shprehen se pjesa më e madhe e turistëve udhëtojnë si familje apo individë. Turistët kryesisht të huaj në këtë periudhë preferojnë të vizitojnë monumentet e kulturës, vlerat natyrore dhe historike zonës së Gjirokastrës.

“Në qytet ndihet që ka lëvizje, ka numër të shtuar njerëzish,  për hir të së vërtetës këtë vit diçka ka  ndryshuar në turizëm d.m.th pjesa më e madhe janë individë ose  grupe të vogla individuale  d.m.th jo grupe siç ishim mësuar që të punonim jo se nuk ka pasur grupe po gjithsesi kjo pjesa individuale  dhe që drejtohet më shumë  nëpër këto shtëpitë e rregulluara, në guest-house ka pasur një nivel pak më të ulët nëpër hotele”, thotë Maksim Hoxha, kryetar i Dhomës së Tregtisë.

Trendi i lartë i vizitueshmërisë turistike pritet të vazhdojë edhe gjatë vjeshtës. Tashmë rreth 80% e kapaciteteve akomoduese janë të ezauruara për muajt shtator dhe tetor

“Gjirokastra është turizëm kulturor dhe muaji shtator-tetor janë muajt  të turizmit kulturor në gjithë botën, rezervimet vijnë nga të gjitha vendet e botës, vjet një numër të madh kanë qenë turistët nga Franca, Spanja, Gjermanët, të cilët në këtë periudhë korrik-gusht nuk para preferojnë Gjirokastrën po kalojnë tani në shtator-tetor, në përgjithësi nga gjithë bota”, shprehet Hoxha.

Tashmë turizmi cilësohet si dega kryesore e ekonomisë për sigurimin e të ardhurave dhe çeljen e vendeve të punës në qarkun e Gjirokastrës.

LEXONI GJITHASHTU:

• Zjarri djeg magazinën me materiale bujqësore në Gjirokastër
• Gjirokastër/ Sezoni veror shton makinat në qarkullim, gjobiten 3500 shoferë