GJKKO zhvillon seancën gjyqësore për çështjen Malaj-Mziu, pretendimet e avokatëve

Në Gjykatën e Posaçme kundër Korrupsionit dhe Krimit të Organizuar u zhvillua këtë të mërkurë seanca gjyqësore ndaj deputetit të Partisë Demokratike, Xhelal Mziu. Ai është paditur nga deputeti socialist Agron Malaj për veprën penale të “shpifjes së kryer botërisht”.

Gjatë seancës, avokati i Mziut, Marash Logu,  argumentoi se deklarata e klientit të tij, e bërë gjatë fushatës elektorale të zgjedhjeve parlamentare të 11 majit, ishte bërë në cilësinë e drejtuesit politik të zonës dhe ishte bazuar në informacione të ardhura nga strukturat e partisë.

Avokati kërkoi nga Prokuroria e Posaçme të bëjë të ditur në çfarë faze ndodhet hetimi i nisur për një ngjarje të ndodhur në Maqellarë, dy ditë para zgjedhjeve të 11 majit.

Nga ana tjetër, pala mbrojtëse e Agron Malajt, aktualisht deputet i Kuvendit dhe ish-kryebashkiak i Matit, deklaroi se klienti i tyre nuk ka qenë në zonën e Maqellarës ditët kur Mziu pretendon se ka ndodhur blerja e votave.

Padia e Malajt u depozitua pas një deklarate të bërë nga Xhelal Mziu një ditë para zgjedhjeve parlamentare të 11 majit, ku ky i fundit akuzoi se një automjet po shpërndante para me qëllim blerjen e votave në favor të Partisë Socialiste.

LEXONI GJITHASHTU:

• Për më shumë se 2 orë në SPAK, Xhelal Mziu jep sqarime për lejet e ndërtimit
• Xhelal Mziu paraqitet në SPAK për kallëzimin e Rakip Sulit