Gjykata e Lartë jep vendimin për vulën e Partisë Demokratike

Gjykata e Lartë ka vendosur të kthejë për rishqyrtim në Apel çështjen gjyqësore për “vulën” e Partisë Demokratike. Burime për Euronews Albania bëjnë me dije se vendimi u mor unanimisht me tre vota pro në Dhomë Këshillimi.

Në deklaratën e bërë publike nga Gjykata e Lartë, Kolegji i gjyqtarëve ka konstatuar se “Gjykata e Apelit të Juridiksionit të Përgjithshëm Tiranë nuk i ka dhënë përgjigje kërkesave të palëve në ankimet respektive, ndërkohë që kryesisht ka marrë në shqyrtim çështje për të cilat palët nuk i kanë ngritur si pretendime në ankim, dhe që gjithsesi nuk përbëjnë shkak për prishjen e vendimit dhe dërgimin e çështjes për rishqyrtim”.

Kolegji vlerësoi se pretendimet e ngritura në ankimet e paraqitura pranë Gjykatës së Apelit të Juridiksionit të Përgjithshëm Tiranë janë çështje të cilat mund të zgjidheshin vetë nga ajo gjykatë.

Në këto kushte, Kolegji Civil i Gjykatës së Lartë, vendosi që të prishë vendimin e marsit të dhënë në Apel dhe rigjykimin e  çështjen nga një trup tjetër gjyqtarësh.

“Prishjen e vendimit nr. 44, datë 03.03.2023 të Gjykatës së Apelit të Juridiksionit të Përgjithshëm Tiranë dhe kthimin e çështjes për rishqyrtim në po atë gjykate, me një trupë tjetër gjykuese”, thuhet në vendimin e Gjykatës së Lartë.

LEXONI GJITHASHTU:

• Gjyqi për “vulën” e PD, mbështetësit e Berishës protestë para Gjykatës së Lartë
• Gërdeci| Shkëlzen Berisha flet pas dëshmisë: Poletizimi, nuk e ndihmon të vërtetën