Gjykata e Posaçme pranon kërkesën e SPAK, pushon çështjen për 2 miqtë e Erjon Alibej

Gjykata e Posaçme ka pranuar kërkesën e SPAK, duke pushuar çështjen për Arsen Preçin dhe Arben Spahiun, dy miqtë e Erjon Alibej

GJKKO vendosi pushimin e çështjes për këta dy persona, duke pranuar kërkesën e prokurorit Behar Dibra. Ky i fundit kërkoi pushim, me argumentin se Spahiu dhe Preçi nuk kanë kryer veprën penale për të cilën janë dyshuar dhe hetuar, por e kanë kryer të tjerë persona, që po hetohen për t’i identifikuar.

Spahiu dhe Precci u arrestuan në muajin shkurt të vitit 2023 në qytetin e Elbasanit, pasi policia kishte dyshime se ata do të kryenin një vrasje me pagesë. Në atë kohë, punonjësit e pastrimit gjetën një armë zjarri pistoletë në lagjen “Emin Matraxhiu”, ndërsa prokuroria zbuloi një makinë “BMW X6” të vjedhur, në brendësi të së cilës u gjetën 3 automatike, një pistoletë dhe dy bidona me benzinë.

Arben Spahiu dhe Arsen Preçi u arrestuan nën dyshimin se do të vrisnin Elton Kilën, i njohur ndryshe si Oti i Elbasanit. Gjatë kontrollit të zonës, policia gjeti edhe dokumente të falsifikuara greke me foto të Arben Spahiut. Po ashtu, një provë u konsiderua edhe një bisht cigareje i gjetur brenda makinës BMW, që prokuroria e Elbasanit tha se i përkiste Arsen Preçit.

Pas këtyre provave, prokuroria e Elbasanit ia referoi dosjen SPAK për kompetencë.