Gjykata e Tiranës liron nga qelia efektivin Admir Elezi

Gjykata e Tiranës ka liruar nga qelia efektivin e policisë Admir Elezi, i arrestuar disa ditë më parë nga Agjencia e Mbikëqyrjes Policore për shpërdorim detyre dhe veprime që pengojnë zbulimin e së vërtetës.

Trupa gjykuese vendosi për oficerin e policisë gjyqësore pranë Komisariatit Nr. 3 në Tiranë masën e sigurisë “arrest në shtëpi”.

Elezi dyshohet se ka manipuluar provat në lidhje me arrestimin e një shtetasi, të cilit iu gjet dhe sekuestrua një shkop metalik i dyshuar si armë e ftohtë.

Sipas Agjencisë së Mbikëqyrjes Policore, gjatë administrimit të sendit, efektivi nuk ka respektuar procedurat standarde të punës, duke ndikuar në tjetërsimin e provave.

“Gjatë kryerjes së veprimeve proceduriale të administrimit të sendit, punonjësi i policisë nuk ka vepruar në përputhje me procedurat standarde të punës, duke ndikuar në tjetërsimin e provave”, thuhej në njoftimin zyrtar të AMP-së.