Gjykata i ‘mbyll gojën’ Trump pas fyerjeve ndaj gjyqtarëve

Gjyqtari që ka nën kontroll procesin civil në dëm të Donald Trump lëshoi një urdhër për heshtjen e tij, pasi ish-presidenti bëri komente përçmuese për një nëpunëse të gjykatës.

Trump kishte sulmuar asistenten e gjyqtarit Arthur Engoron përmes një postimi në rrjetin e tij social, “Truth Social”.

Vetë gjyqtari paralajmëroi me “sanksione serioze” nëse urdhri i tij shkelej.

Trump ka bërë vazhdimisht sulme personale ndaj gjyqtarit duke e quajtur atë një “të çmendur” dhe një “gjykatës mashtrues”.

Por urdhri i dhënë të martën kufizon dhe ndalon komentet kundër institucionit të drejtësisë dhe stafit të tij.

Të martën, Trump postoi një foto të punonjëses Allison Greenfield me liderin e demokratëve në Senatin amerikan, Chuck Schummer në një fushatë elektorale.

Në postim, ai e quajti zonjën Greenfield “të dashurën e Schumer” dhe përsëriti se çështja ndaj tij duhet të pushohet.

Vetë gjyqtari Engoron, në reagimin e tij i cilësoi sulmet e Trump si të pavërteta dhe theksoi se agresionet ndaj anëtarrëve të stafit do të konsiderohen të papranueshme dhe nuk do të tolerohen.

Zyrtari i lartë tha më tej se masa e tij duhet të konsiderohet një urdhër që ndalon çdo postim, email apo deklarata publike për anëtarët e stafit.

Menjëherë pas lëshimit të urdhrit, postimi i zotit Trump në rrjetet sociale u fshi.

LEXONI GJITHASHTU:

• “Raciste, mashtruese”- Përplasje të ashpra në gjyq, Trump akuza të rënda prokurores
• “Gjyq i turpshëm”, Trump në përballjen e parë në procesin që rrezikon pronat e tij