Gjykata Kushtetuese kalon për shqyrtim çështjen Beleri

Gjykata Kushtetuese ka kaluar për shqyrtim çështjen e kryebashkiakut të zgjedhur të Himarës, Fredi Beleri.

Beleri kërkoi shpalljen të pavlefshëm vendimin e gjykatës për arrestimin dhe mbajtjen e tij në qeli gjë që po e privon nga betimi si kryebashkiak, kërkesë që u kaluan për shqyrtim nga Kushtetuesja.

“Mbledhja e Gjyqtarëve të Gjykatës Kushtetuese në datën 23.10.2023, bazuar në nenin 21, pika 1, të ligjit nr.8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar, ka vendosur kalimin e çështjes për shqyrtim në seancë plenare mbi bazë të dokumenteve.”, thuhet në njoftimin e Kushtetueses.

Fredi Beleri u arrestua në ambientet e një lokali në Himarë, vetëm 2 ditë para zgjedhjeve lokale të 14 majit, pasi u kap në flagrancë bashkë më bashkëpunëtorin e tij Pandeli Kokaveshi duke blerë vota. Beleri nuk ka mundur të marrë detyrën, pasi autoritetet gjyqësore nuk i dhanë leje për të kryer betimin.

Aktualisht Beleri ndodhet në burgun 313 të Tiranës, ndërsa Kokaveshi në Qendrën Spitalore Universitare “Nënë Tereza”.

LEXONI GJITHASHTU:

• Kërkoi pushimin e çështjes, sot seanca në GJKKO për Belerin
• GJKKO pranon kërkesën e Belerit për përjashtimin e gjyqtares Deda nga trupa gjykuese