Kriza në sistemin e drejtësisë po thellohet në gjykatat e shkallëve të para. Rreth 37 mijë ishte stoku në fillim të këtij viti në të 22 gjykatat e vendit.

Krahasuar me fillimin e 2021 janë 28% më shumë dosje në arkivin e gjykatave.

Ndërsa shifra mund të jetë rritur me më shumë se 3 mijë dosje gjatë këtyre 4 muajve të parë të 2020.

Situata më e vështirë është në gjykatën e kryeqytetit. Ajo ka numrin më të madh të dosjeve të prapambetura me gjysmën e totalit, rreth 20 mijë.

Qytetarëve, sidomos në Tiranë, do t’i duhen vite pritje për të marrë drejtësi.

Aktualisht në gjykatën e Tiranës ushtrojnë detyrën 51 gjyqtarë nga 76 që është organika, ndërsa një pjesë e mirë e tyre po përballen me vetingun, Mungesa e 25 gjyqtarëve ka sjellë stokun prej 20 mijë çështjesh.

Në të gjitha shkallët e gjyqësorit në vend  ka në total 126 mijë dosje të prapambetura.

I vetmi institucion që mund të ndërhyjë në një situatë të tillë është Këshilli i Lartë Gjyqësor, i cili mund të plotësojë vendet vakante.

Por për këtë vit KLGJ nuk mund të emërojë pasi shkolla e magjistraturës nuk ka diplomuar asnjë gjyqtar të ri.

LEXONI GJITHASHTU:

• Gjykata e Apelit të Tiranës në kolaps, 20 mijë dosje kanë mbetur stok
• Mbi 35 mijë dosje stok në Gjykatën e Lartë