Drejtori i përgjithshëm i Policisë së Shtetit, Gledis Nano ka shkuar të enjten për një vizitë në familjen Avdia, që dy ditë më parë humbi vajzën 7-vjeçare nga aksidenti tragjik në Himarë.
Në një prononcim për mediat pas vizitës së ngushëllimit në familje Avdia, Nano kërkoi të mos keqinterpretohej prania e tij, teksa theksoi se kishte shkuar pranë tyre si prind dhe qytetar.
“Falenderoj familjen Avdia që mirëpriti ngushëllimet e mia dhe përveç çfarë ka ndodhur dhe përgjegjësive, i mirëkuptoj që ngjyrime të caktuara i kanë lënë mënjanë dhe janë duke vuajtur atë çfarë ndodhi”, tha Nano.
Në një komunikim për mediat nga Dhërmiu një ditë më parë Nano u shpreh se nuk do të tolerojë askënd, aq më pak efektiv policie që të shkelë ligjin.
Referuar tragjedisë në Himarë ku një 7-vjeçare humbi jetën e përplasur nga një mjet motorik Nano tha se policia është e mobilizuar në terren në të gjithë bregdetin për të monitoruar veprimtarinë e mjeteve motorike.
Gledis Nano përjashtoi nga policia Arjan Tase, ish-efektin që shkaktoi aksidentin fatal, ditën e tragjedisë.
Vajza 7-vjeçare e familjes Avdia humbi jetën mesditën e 2 gushtit në Himarë, teksa pushonte me familjen e saj. E mitura u përplas për vdekje teksa ishte në breg, nga një gomone që drejtohej nga ish-shefi i komisariatit të Himarësm Arjan Tase.
LEXONI GJITHASHTU:
- Ish-polici Arjan Tase do hetohet për vrasje nga pakujdesia
- ‘Nuk e vrau varka, por shteti’, sot protesta për vdekjen e 7-vjeçares
