Goditen tre raste të shpërndarjes së drogës në Shkodër, tre persona në pranga

Tre raste të shpërndarjes së lëndëve narkotike janë goditur në qytetin e Shkodër, në kuadër të operacionit të koduar “Rotondo”. Si rezultat, tre shtetas janë vënë në pranga, ndërsa janë sekuestruar sasi kanabisi të ndara në doza gati për shitje, si dhe një mjet prerës (thikë).

Operacioni u finalizua nga Seksioni për Hetimin e Narkotikëve, në bashkëpunim me Forcën e Posaçme “Shqiponja” dhe Seksionin e Mbështetjes Operacionale të Hetimit, nga ku u bë e mundur vënia në pranga :

K. Gj., 27 vjeç, banues në fshatin Bregu i Lumit;

F. N., 26 vjeç, banues në fshatin Hot i Ri;

J. Ç., 25 vjeç, banues në Shkodër.

Sipas policisë, K. Gj. u kap në flagrancë në rrethrrotullimin e fshatit Stom Golem, duke lëvizur me automjet tip “Land Rover”. Gjatë kontrollit të mjetit iu gjet një sasi lënde narkotike kanabis, ndërsa në çantën e tij u konstatua edhe një thikë.

Ndërkohë, F. N. u arrestua në sheshin “Luigj Gurakuqi”, ku gjatë kontrollit fizik iu sekuestrua një sasi kanabisi e ndarë në doza. Po ashtu, J. Ç. u kap në sheshin “Nënë Tereza”, ku iu gjet dhe sekuestrua një sasi lënde narkotike kanabis e ndarë në doza, në cilësinë e provës materiale.