Goditet një grup kriminal që shiste drogë në Dimal, arrestohen 3 persona! Në kërkim edhe 2 të tjerë

Tre pjesëtarë të një grupi kriminal që shisnin drogë janë vënë në pranga nga policia në Dimal. Lidhur me këtë operacion mësohet se janë shpallur në kërkim edhe dy pjesëtarë të tjerë të grupit.

Ata akuzohen për veprën penale “Prodhimi dhe shitja e narkotikëve”, kryer në bashkëpunim. Të rinjtë të organizuar si grup, siguronin lëndë narkotike kokainë e ndanin në doza dhe më pas e shitnin në qytetin e Dimalit.

Një 22-vjeçar dhe një 19-vjeçar janë lënë nën masën “Arrest në burg” dhe një 17-vjeçar është lënë në arrest në shtëpi. Në kërkim janë shpallur një 22-vjeçar dhe një 26-vjeçar ndërsa ndaj tyre janë caktuar masat e sigurisë “Arrest në burg”.

“Finalizohet operacioni policor i koduar “Dimali 3”, për goditjen e një grupi kriminal që shiste lëndë narkotike kokainë, në Dimal. Operacioni u zhvillua nga Seksioni për Hetimin e Narkotikëve, në bashkëpunim me Forcën e Posaçme Operacionale dhe nën drejtimin e Prokurorisë së Beratit.

Arrestohen 3 pjesëtarë të grupit dhe shpallen në kërkim 2 të tjerë. Si rezultat i hetimit të ndjekur për disa muaj, me metoda proaktive, nën drejtimin e Prokurorisë, me objektiv nxjerrjen përpara përgjegjësisë penale të disa shtetasve, të cilët, të organizuar si grup, shitnin doza të lëndës narkotike kokainë në Dimal, specialistët e Seksionit për Hetimin e Narkotikëve, në bashkëpunim me Forcën e Posaçme Operacionale, finalizuan operacionin “Dimali 3”.

Në kuadër të këtij operacioni u ekzekutuan masat e sigurisë të caktuara nga Gjykata e Beratit, konkretisht: “Arrest në burg” për shtetasit M. M., 22 vjeç, dhe A. B., 19 vjeç; “Arrest në shtëpi” për shtetasin E. M., 17 vjeç, të tre banues në Kuçovë, për veprën penale “Prodhimi dhe shitja e narkotikëve”, kryer në bashkëpunim.

Gjithashtu, janë shpallur në kërkim 2 pjesëtarë të tjerë të këtij grupi, shtetasit K. A., 26 vjeç, dhe A. B., 22 vjeç, pasi ndaj tyre janë caktuar masat e sigurisë “Arrest në burg”, për të njëjtën veprimtari kriminale.

Gjatë periudhës hetimore janë siguruar prova se këta shtetas, të organizuar si grup, siguronin lëndë narkotike kokainë e ndanin në doza dhe më pas e shitnin në qytetin e Dimalit. Materialet procedurale iu referuan Prokurorisë së Beratit për veprime të mëtejshme”, njofton policia.