Grafeni: Njihuni me materialin e së ardhmes, 200 herë më i fortë se çeliku

Grafeni është quajtur si materiali i së ardhmes pasi është shumë i fortë dhe përfshin një gamë të gjerë përdorimesh të mundshme. Studiuesit europianë sapo kanë nxjerrë udhëzuesin e parë sesi mund të prodhohet ky material.

Udhëzuesi është botuar nga Shoqata e Grafenit, e përbërë nga një sërë universitetesh dhe kompanish. E themeluar në 2013, është një nga 3 projektet e mëdha shkencore të financuara nga BE-ja me një buxhet mbi 1 miliard euro deri në 2023.

Shoqata shpreson se udhëzuesi do të nxisë përdorimin e këtij materiali, i cili ka potencialin që të revolucionarizojë industri të tëra.

Grafeni është një shtresë atomesh karboni që nxirret nga grafiti, i cili gjendet dhe në majën e lapsit.

Në dukje i ngjason huallit, është 200 herë më i fortë se çeliku, se diamanti dhe përçon nxehtësi dhe elektricitet më mirë se çdo material tjetër, përfshi këtu arin apo bakrin. Dhe gjithashtu është një milion herë më i vogël se një fije floku.

70 studiues morën pjesë në hartimin e udhëzuesit prej 500 faqesh.

“Është një libër i madh që përmban përshkrimin e pjesës më të madhe  të mënyrave sesi mund të prodhohet grafeni dhe materiale të tjera dy-dimensionale”, tha për Euronews, Mar García Hernández nga Shoqata e Grafenit.

Përkulshmëria dhe aftësia ripërtëritëse e këtij materiali do të thotë që mund të përdoret në shumë industri si aeronautika, eksplorimi i hapësirës, mjekësia, energjia dhe pajisjet elektronike.

Dhjetorin e shkuar Shoqata e Grafenit bashkëpunoi me disa nga kompanitë më të mëdha në Europë si Airbus, Fiat- Chrysler, Lufthansa, Siemens,

Një nga projektet është zhvillimi i sensorëve që mund të jetë shumë i rëndësishëm për përdorimin e sigurtë të makinave pa pilot, ndërsa një tjetër do të përdorë filtra të krijuar nga grafeni për të hequr ndotës si pesticidet dhe patogjene të rrezikshme nga uji i pijshëm.