Burime nga Ministria e Brendshme e cila po ndjek rastet e ekstradimeve te personave me rrezikshmëri të lartë dhe korrupsion, i konfirmuan Euroneës Albania se Gjykata e Apelit  të Janinës ka dhënë vendim pozitiv për ekstradimin e Laert Haxhiut.

“Gjykata e Shkallës së Dytë të Janinës vendosi pozitivisht për ekstradimin e Haxhiut. Por Haxhiu ka të drejtë, sipas legjislacionit grek, të kërkojë shqyrtimin e ekstradimit të tij nga Gjykata e Lartë”, thuhet në vendimin e gjykatës.

Haxhiu po gjykohet në Shqipëri për masakrën e Lushnjës në vitin 2017, ngjarje për të cilën më herët janë dënuar me burgim të përjetshëm bashkëpunëtoret e tij Orges Bilbili dhe Anterio Kaloshi. Laert Haxhiu ndodhet i arrestuar në Greqi ku ka kërkuar azil ndërsa Shqipëria kërkon ekstradimin e tij.

Së fundi ai u ekspozua nga dëshmia e Artan Tafanit lidhur me disa ngjarje të rënda kriminale të viteve të fundit, ku sipas tij planifikonte të kryente atentate ndaj 2 prokurorëve dhe një avokati.