Gripi i shpendëve edhe në Gjirokastër, asgjësohen 20 pula në fshatin Valare

Në Gjirokastër është konstatuar vatra e parë me gripin e shpendëve. 20 pula në fshatin Valare janë groposur nga specialistët e shërbimit veterinar. Dyshimet e para janë ngritur nga vetë banorët, të cilët kanë lajmëruar sektorin e veterinarisë.

Mjeku veteriner, Krenar Veliu shjegoi me konkretisht procesin se si kanë vepruar në momentin që është konstatuar diça e tillë.

“Ditën e premte veterineri ka marrë informacionin nga fermeri që i kishin ngordhur disa pula së bashku shkuam në terren dyshuam, morëm mostër dhe pulat e tjera i groposëm siç thotë ligji ndërsa ditën e shtunë doli përgjigja që është ngrordhje nga gripi i shpendëve”, tha Veliu.

Shërbimi veterinar apelon për kujdes të shtuar nga fermerët për parandalimin dhe evidentimin e rasteve të gripit të shpendëve.

“Në të gjitha zonat ne kemi mjekë veteriner ku kanë marrë kontakt me kryepleqtë e fshatrave me njësitë administrative, me fermerët dhe i kemi vënë në dijeni  për të na informuar për dëmtimet nëse ka ndaj iu bëj thirrje fermerëve dhe komunitetit se kjo është një sëmundje që vjen nga shpendët e egër që nëse do të ketë dëmtime të shpendëve të oborrit por edhe shpendëve duhet të njoftojnë veterinerin”, u shpreh mjeku veteriner.

Gripi i shpendëve është një sëmundje që prek shpendët e llojeve të ndryshme. Pak ditë më parë, disa zogj të egër u gjetën të ngordhur në plazhin e vjetër të Vlorës, ku pas analizave rezultoi se ishin të prekur me gripin e shpendëve.