Grossi: Kapacitetet e pasurimit bërthamor të Iranit janë ngadalësuar

Sulmet izraelite i kanë penguar ndjeshëm, por jo plotësisht, aftësitë e pasurimit bërthamor të Iranit, tha për CNN kreu i organit mbikëqyrës bërthamor të Kombeve të Bashkuara.

Drejtori i Përgjithshëm i Agjencisë Ndërkombëtare të Energjisë Atomike, Rafael Grossi, tha se sulmet kanë dëmtuar disa centrale bërthamore, ku Natanzi është më i godituri. Impianti i pasurimit mbi tokë është “shkatërruar plotësisht”, ndërsa instalimet e tij elektrike janë “çaktivizuar”, duke shkaktuar mosfunksionimin e centrifugave nëntokësore.

Rreth tre ose katër ndërtesa në centralin bërthamor të Isfahanit pësuan gjithashtu dëme “të konsiderueshme”, por objektet e tij nëntokësore duket se nuk janë prekur.

Ndërkohë, vendi i pasurimit në Fordow nuk duket se ka pasur dëme të mëdha përveç “ndikimeve perimetrale”, tha Grossi.

I pyetur se sa kohë do t’i duhej Iranit për të zhvilluar teorikisht një armë bërthamore, Grossi sugjeroi se nuk ishte çështje ditësh, por as nuk do të duheshin vite.

“Do të guxoja të isha ndoshta më serioz në lidhje me këtë. Nuk mendoj se (do të ishte) çështje vitesh. Por këto janë spekulime”, tha ai.