Gruaja i kërkon divorcin Bashar al-Assad, e pakënaqur me kushtet në Rusi

Sipas raportimeve të mediave ndërkombëtare, Asma al-Assad, gruaja e ish-presidentit sirian Bashar al-Assad, ka paraqitur një kërkesë për divorc në gjykatat ruse dhe po kërkon leje për t’u kthyer në Londër për trajtim urgjent mjekësor.

E diagnostikuar me leuçemi, Asma ka depozituar dy kërkesa në një gjykatë ruse, raportoi media turke Haber Turk. Njëri prej kërkesave lidhet me divorcin, ndërsa tjetri për të marrë leje për t’u larguar nga Moska, ku familja Assad kërkoi strehim pas rënies së regjimit të Bashar al-Assad.

Sipas burimeve pranë çiftit, Asma, e cila më parë punonte si bankiere investimesh në Londër, dëshiron të kthehet në Mbretërinë e Bashkuar për të marrë kujdes të specializuar. Nëna e saj, Sahar al-Akhras, një ish-diplomate siriane dhe shtetase britanike, ka angazhuar firma të njohura ligjore në Londër për të ndihmuar në kthimin e saj.

Ky zhvillim vjen disa javë pas largimit të familjes Assad nga Damasku, pasi kryeqyteti sirian ra në duart e forcave rebele. Thuhet se Asma al-Assad nuk është e kënaqur me kujdesin mjekësor të ofruar në Moskë, ku familja ka gjetur strehim të përkohshëm.

Divorci i mundshëm mund të shtojë sfida të tjera për Bashar al-Assadin, i cili tashmë përballet me pasoja të mëdha politike pas humbjes së pushtetit. Ndarja ka të ngjarë të ndikojë më tej në të ardhmen e ndikimit të familjes Assad në rajon shkruajnë mediat ndërkombëtare.

Asma al-Assad, e cila dikur u përshkrua si “Trëndafili i Shkretëtirës” nga mediat perëndimore, u martua me Bashar al-Assadin në vitin 2000, menjëherë pasi ai pasoi babanë e tij në postin e presidentit të Sirisë.

LEXONI GJITHASHTU:

• Reagimi i parë i Assad pas rrëzimit: Nuk kisha ndërmend të largohesha deri sa…
• BE-ja angazhohet me udhëheqësit e rinj të Sirisë pas rrëzimit të Asadit