Hakerat kineze sulmojnë SHBA, goditet Departamenti i Thesarit

Departamenti amerikan i Thesarit ka deklaruar se hakerat kinezë kanë mundur të vjedhin dokumente të rëndësishme përmes një sulmi kibernetik të kryer në orët e para të së martës.

Institucioni përgjegjës për nxitjen e prosperitetit ekonomik dhe garantimin e sigurisë financiare të Uashingtonit ka deklaruar se hakerat mundën të tërhoqnin dosje të paklasifikuara, pasi kishin kompromentuar një palë të tretë të lidhur me shërbimin e software-it.

Departamenti nuk dha detaje se sa ishin përmasat e sulmit, apo mbi rëndësinë e dokumenteve të vjedhura, por në një letër dërguar ligjvënësve amerikanë, ai thoshte se pas agresionit të parë nuk ka të dhëna që të sugjerojnë vazhdimin e tij.

Një zëdhënës i institucionit deklaroi ndërkohë se një hetim për identifikimin e natyrës së depërtimit të hakerave është në zhvillim e sipër.

Konstatimi vjen teksa autoritetet amerikane vazhdojnë të luftojnë me fushatën masive të spiunazhit kibernetik të Kinës, e njohur si “Tajfuni Salt”, që u ka dhënë zyrtarëve në Pekin akses tek mesazhet private dhe bisedat telefonike të shumë amerikanëve.

Të paktën 9 kompani telekomunikacionesh në Shtetet e Bashkuara janë prekur nga sulmet kibernetike, sipas një zyrtari të Shtëpisë së Bardhë që ka ruajtur anonimatin.

Vetë autoritetet amerikane mësuan për fushatën “Tajfuni Salt” më 8 dhjetor, kur një ofrues i shërbimit të software-it, “Beyond Trust”, u raportoi atyre incidentin.

LEXONI GJITHASHTU:

• Studimi: Rusia shtoi dezinforimimin mbi masat pas urganëve, ja çfarë nxiti
• Hakerat kinezë synuan të marrin të dhëna nga telefonat e Donald Trumpit dhe JD Vance