Haradinaj: Hapja e Urës së Ibrit, përgjigjja më e mirë për “kuvendin gjithëserb”

Kreu i AAK-së, Ramush Haradinaj tha se Serbia brenda dy jave e ka poshtëruar dy herë Bashkësinë Ndërkombëtare dhe QUINT-in duke e organizuar të ashtuquajturin “Kuvendi gjithëserb”.

Haradinaj përmes një reagimi në faqen e tij në Facebook ka thënë se në atë takim në Serbi janë dhënë deklarime mesjetare që bien ndesh me thirrjet ndërkombëtare për stabilitet.

Sipas ish-kryeministrit të Kosovës përgjigjja më e mire që do të mund t’i jepej Serbisë nga ndërkombëtarët dhe Kosova do të ishte hapja e Urës së Ibrit.

“Brenda një jave Serbia dy herë poshtëroi Bashkësinë Ndërkombëtare dhe QUINT-in me të ashtuquajturin “Kuvendi gjithëserb”, ku u dhanë deklarata mesjetare e po ashtu edhe Vulin nga Moska me deklaratat e tij mesjetare të cilat bien ndesh me thirrjet ndërkombëtare për stabilitet në Ballkanin Perëndimor. Bashkësia Ndërkombëtare dhe Kosova përgjigjen më të mirë do t’ia jepte Vulinit dhe të gjithëve me mendësi të tillë, me hapjen e Urës së Ibrit”, ka shkruar Haradinaj në një postim në Facebook.