Haradinaj në Departamentin e Shtetit: NATO, çelësi i sigurisë për Kosovën

Ramush Haradinaj ka reaguar përmes një postimi në Facebook lidhur me takimin e zhvilluar në Departamentin Amerikan të Shtetit, ku ka takuar zëvendësndihmës Sekretarin për Çështje Evropiane dhe Euroaziatike, Daniel J. Lawton.

Në mesazhin e tij, Haradinaj ka vënë theksin te mbështetja e vazhdueshme e Shteteve të Bashkuara për Kosovën, si dhe te rëndësia e partneritetit strategjik mes dy vendeve, duke nënvizuar anëtarësimin e Kosovës në NATO si faktor kyç për sigurinë dhe stabilitetin në rajon.

“Pata nderin në Departamentin Amerikan të Shtetit, të takoj z. Daniel J. Lawton, Zëvendës Ndihmës Sekretar i Departamentit të Shtetit, pranë Byrosë për Çështje Evropiane dhe Euroaziatike. E falënderova z. Lawton për mbështetjen e palëkundur që Shtetet e Bashkuara i kanë dhënë Kosovës, nga liria jonë deri te ndërtimi i demokracisë dhe institucioneve shtetërore.

Theksova se partneriteti dhe miqësia ndërmjet Kosovës dhe Shteteve të Bashkuara të Amerikës janë të qëndrueshme dhe strategjike. Anëtarësimi i Kosovës në NATO jo vetëm që do të forcojë sigurinë tonë, por do të kontribuojë gjithashtu në paqe, stabilitet dhe mbrojtje kolektive në të gjithë Ballkanin Perëndimor dhe komunitetin euro-atlantik”, tha Haradinaj