Harris sfidon Trump në debat, kandidatja e PD: Nëse ka diçka, të ma thotë në fytyrë

Tubimi në Atlanta i Kamala Harris mblodhi një turmë që deri më tani nuk ishte parë në fushatën elektorale të demokratëve.

E emocionuar, por e qeshur, kandidatja e demokratëve për Presidencën e SHBA u prit me ovacione dhe duartrokitje.

Në fjalën e saj, Harris përdori gjithnjë e më shumë tonet e sfidës me Donald Trump dhe e vuri atë në lojë për tërheqjen nga debati televiziv i shtatorit.

Ajo u shpreh e gatshme të takohej me të në një përballje të tillë, duke i drejtuar ish-presidentit mesazhin: “Donald, nëse ke diçka për të më thënë, ma thuaj në fytyrë”.

Harris e sulmoi Trump duke e krahasuar atë me mashtruesit, por edhe sa i takon emigracionit, fusha ku ajo duket më e dobët dhe më e cënueshme.

Kandidatja premtoi se do të ripërtërijë akordin për kufirin që sipas saj, Trump e “vrau” në Kongres pasi nuk i interesonte siguria e vendit, por figura e tij.

Në vijim të fjalimit, Harris preku temat e diskutuara në mitingjet e fundit të saj, duke kaluar nga sulmet ndaj Trump tek politikat e tij dhe tek agjenda ekstremiste “Projekti 2025”.

Ajo ritheksoi angazhimin e saj për klasën e mesme, uljen e çmimeve për familjet, luftën për një shëndetësi më të drejtë dhe për liritë e grave, duke filluar nga ajo për abortin.

“Ditën e parë të marrjes së detyrës do të merrem me çështjen e rritjes së çmimeve dhe atë të uljes së kostove. Do t’i ndalojmë taksat e fshehta dhe shpenzimet e tepërta që bankat dhe kompanitë e tjera përdorin për të rritur fitimet e tyre”, premtoi Harris.

LEXONI GJITHASHTU:

• Si ish-presidenti Trump po ndryshon fushatën për përballjen me Kamala Harrisin
• Biden dhe Harris do të takohen veçmas me Netanyahun për armëpushimin e Gazës