Harta, libra dhe foto të Marubit, Mali i Zi dhe Shqipëria ekspozitë të përbashkët

“Udhëzues për Shqipërinë”, “Gjuha e Shqiptarëve” dhe “Katër muaj në Shqipëri”, janë disa nga librat e ekspozuar në Bibliotekën Kombëtare në Tiranë.

Në ekspozitën që vjen në Tiranë nga Biblioteka Kombëtare e Malit të Zi, publiku mund të shohë harta të rralla, kartolina që trajtojnë temën e Shqipërisë në shekujt XIX dhe XX, si edhe punime të fotografit të njohur shqiptar Pjetër Marubi.

“Ekspozita e librave të vjetër, hartave dhe kartolinave për Shqipërinë përfaqëson gjithashtu kujtesën e përbashkët kulturore të Malit të Zi dhe Shqipërisë, si dhe përkushtimin e bibliotekarëve për ruajtjen dhe qasjen ndaj trashëgimisë së shkruar të të gjitha komuniteteve kombëtare në Mal të Zi. Prandaj manifestimi ‘Java e Kulturës së Malit të Zi në Shqipëri’, ku marrim pjesë për herë të dytë, tregon sa të rëndësishme janë këto ngjarje për forcimin e lidhjeve kulturore dhe përkuptimin më të mirë të popullit malazez dhe atij shqiptar me veçantitë e tyre”, thotë Dragica Lompar, drejtore e Bibliotekës Kombëtare të Malit të Zi.

Mes librave të prezantuar veçohen udhërrëfyesi nëpër Shqipëri dhe Mal të Zi në gjuhën gjermane, botuar në Mynih në vitin 1913, “E folmja e shqiptarëve”, po ashtu në gjermanisht, si dhe një udhërrëfyes nëpër Shqipëri i vitit 1930, me informacione për qytetet e Shkodrës, Tiranës dhe Korçës.

Mes drejtoreshës së Bibliotekës Kombëtare të Malit të Zi dhe drejtorit të Bibliotekës Kombëtare të Shqipërisë, Piro Misha, u nënshkrua një marrëveshje bashkëpunimi.

Ekspozita paraqet një pjesë të dokumenteve nga fondet e Arkivit Kombëtar të Malit të Zi që lidhen me veprimtarinë diplomatike të Principatës së Malit të Zi në periudhën pas Kongresit të Berlinit 1878 dhe deri në fillimin e Luftës së Parë Botërore.

LEXONI GJITHASHTU:

• Hapet ekspozita “Elbasani në 100 vjet”, historia e qytetit vjen përmes fotografive
• Skulptura “Kalorësi i Babunjës” rikthehet në Shqipëri pas ekspozitës në Vjenë